Vieiros

Os traballadores da planta de leite Pascual en Outeiro de Rei cortaron esta cuarta feira o tránsito da N-VI (A Coruña-Madrid) e acordaron novas mobilizacións para protestaren pola incerteza que padecen ao estar afectados por un ERE temporal que se converterá en extinción de contratos o 4 de Nadal. A Garda Civil desviou parte dos vehículos por rutas alternativas.

Os traballadores reuníronse ademais en asemblea. Nesta acordouse impulsar novas mobilizacións para os días vindeiros, que se unen ao peche indefinido que iniciaron hai exactamente unha semana nas inmediacións da factoría.

As novas accións comezarán o venres cun magosto reivindicativo no campamento en que están instalados, e continuarán cun via crucis o luns a partir das 11.00 horas. Tamén teñen previsto desprazarse até o Parlamento para escoitar en directo a resposta a unha pregunta que formulará o BNG sobre a situación da factoría e dos seus 105 operarios.