Vieiros

A fotografía dun lobo ibérico saltando unha cancela recibiu o premio Wildlife Photographer of the Year 2009 na categoría de retratos animais. A obra de José Luis Rodríguez foi destacada entre 43 mil participantes dun galardón que organizan a BBC Wildlife Magazine e o Museo de Historia Natural de Londres e que chegou á súa 45 edición.

Segundo explicou no medio público británico, Rodríguez planificou a imaxe durante anos sobre o papel. "Quería capturar unha foto na que puideses ver un lobo nun acto de caza, pero sen sangue. Non quería unha imaxe cruel". A instantánea tirouna despois de moita paciencia e de observar os movementos dos lobos. Fabricou unha "trampa" de infravermellos para disparar xusto no salto do lobo.

Un dos membros do xurado, o fotógrafo especializado en fauna Mark Carwardine, describiu a imaxe gañadora como "a captura de miles de anos de interacción entre o ser humano e o lobo nun instante".