Vieiros

"O dereito á educación de toda unha xeración foi posto en perigo por aquelas persoas cuxa avaricia e irresponsabilidade orixinaron a crise", expón con motivo do Día Mundial do Profesorado o secretario xeral da Internacional da Educación (IE), Fred van Leeuwen.

"Como docentes e sindicalistas é a nosa misión facer todo o posíbel por evitar que se vexan ameazadas as súas oportunidades de aprendizaxe", engade o voceiro desta plataforma que agrupa 401 organizacións e cerca de 30 millóns de docentes en todo o mundo. "Os gobernos deben comprometerse a introducir as políticas e achegar os fondos necesarios para resolver a escaseza de docentes no mundo", reclama o colectivo.

"Non pode ser que baixo a escusa da crise económica se adopten medidas que degradan o ensino", advirten en Galiza desde a CIG-Ensino, unha das formacións fundadoras da IE. Sinalan desde a CIG ao fío asuntos de actualidade no país como é o caso da eliminación da gratuidade dos libros de texto, o incumprimento do acordo sobre os cadros de persoal nos centros ou a supresión de subvencións para actividades formativas aos movementos de renovación pedagóxica. "Pola contra, esta crise económica semella non existir á hora de gastar en propaganda que só busca agochar o retroceso que supón a política do PP no eido educativo", reprochan.