Vieiros

Yevgeny Dzhugashvili, neto de Iosef Stalin, levou aos tribunais o Novaya Gazeta polas publicacións do xornal ruso, onde traballou a asasinada Anna Politkovskaya, en que afirma que o ex dirixente soviético asinou persoalmente a orde de executar milleiros de cidadáns da extinta URSS.

A figura de Stalin está a rexurdir na sociedade rusa, que se divide entre os que o ven como un heroe revolucionario que derrotou os nazis e converteu a Unión Soviética nunha gran superpotencia e entre os que o consideran un ditador sanguinario.

Dzhugashvili, de 73 anos oficial das forzas aéreas retirado, solicita unha indemnización de arredor de 200 mil euros ao Novaya Gazeta e 12 mil máis ao xornalista que escribiu o artigo. O xuízo comezou este martes e retomarase dentro dun mes.

O avogado da publicación, Henri Reznik, considera que o debate sobre se Stalin foi bo ou malo non rematará. "Nunca se vai poder estabelecer unha liña cando se trata dunha figura como a de Stalin", sinalou.