Vieiros

O Sindicato de Traballadoras e Traballadores do Ensino de Galiza (STEG) fixo público este xoves un comunicado no que acusa á Consellaría de Educación de suprimir prazas de profesorado para a integración de alumnado de etnia xitana. Segundo sostén este sindicato, o ano pasado había 29 prazas de docentes que se desprazaban até diferentes centros para apoiar pedagoxicamente aos rapaces con máis problemas de aprendizaxe e integración.

Na nova convocatoria de prazas, a Xunta opta por asignar as prazas aos centros. Porén, dende o STEG afirma que este cambio vai rematar co servizo xa que explican que consultaron cos centros e que dende estes sinalan que o profesorado co que contan é preciso para o desenvolvemento das necesidades académicas ordinarias.

O STEG solicita que se recupere o modelo anterior onde os profesores estaban especializados en cumprir a función: “o seu cometido ía máis aló da atención ao alumnado ao traballar coas familias das nenos e nenos. Podemos dicir que, en liñas xerais, o programa funcionaba ben e cumpría os obxectivos cos que nacera”.