Vieiros

Unión Fenosa obtivo un beneficio de 672,5 millóns de euros no primeiro semestre, o que representa un crecemento do 3,1% respecto a igual período de 2008, informou este luns a eléctrica á Comisión Nacional do Mercado de Valores (CNMV).

A compañía explicou que o resultado se viu favorecido, ademais de pola boa evolución dos negocios, polas plusvalías obtidas coa venda das súas participacións en Cepsa e Rede Eléctrica e a venda de accións de Isagen. O resultado bruto de explotación (Ebitda) de Fenosa ascendeu a 1.111,8 millóns de euros nos seis primeiros meses do ano, un 1% máis, en tanto que o resultado neto (Ebit) se situou en 805,3 millóns, cifra lixeiramente superior á de igual período de 2008.

A débeda financeira bruta de Unión Fenosa alcanzou a peche de xuño 7.074,2 millóns de euros, incluíndose nesta cantidade a súa contribución ao financiamento do déficit tarifario de 2006, 2008 e 2009 por importe de 920,6 millóns de euros. Durante este ano, a débeda da compañía incrementouse en 189,1 millóns.