Vieiros

As accións do grupo farmacéutico galego Zeltia subían un 6% á media mañá deste venres logo de que Filipinas aprobou o uso do composto Yondelis para o tratamento do cancro de ovario recorrente e o sarcoma de tecidos brandos (STS).

A compañía destacou que "a aprobación de Yondelis para o tratamento do cancro de ovario recorrente por parte das autoridades filipinas supón a primeira aprobación para Yondelis nesta indicación".

Distribución fóra do EEE
PharmaMar, filial de Zeltia, comercializa Yondelis nos máis de 30 países do Espazo Económico Europeo (EEE), incluído Suíza. Filipinas súmase aos de fóra deste grupo, onde xa está á venda: Arxentina, Colombia, Venezuela, Corea do Sur e Rusia.

Yondelis ten, ademais, designación de "medicamento orfo" (en enfermidades pouco frecuentes) para o tratamento de sarcoma de tecidos brandos e cancro de ovario na Unión Europea, Estados Unidos e Suíza, e en Corea do Sur para sarcoma de tecidos brandos.