Vieiros

Este venres celébrase no Telecentro de Comunicación de Monterroso, situado no Centro Sociocultural da vila, unha xornada de contacto con Arxentina mediante videoconferencia. Este mecanismo permitirá a 20 familias do lugar restablecer contacto cos seus familiares de Bos Aires, e non é a primeira vez que se realiza este tipo de iniciativas nesa instalación.

A vontade de realizar este acto procede da Secretaría Xeral de Medios, e está integrada na campaña de dinamización da Rede de Telecentros de Comunicación "Comunícate". Estas actividades estanse promovendo nos distintos centros dependentes do Centro Multimedia de Galicia (CMG) para dar a coñecer á poboación as distintas posibilidades que ofrecen estas instalacións.

Actualmente a Rede de Telecentros de Comunicación de Galicia dispón de TC nas localidades de Coruña, Abegondo, Arzúa, Betanzos, Boiro, Carballo, Melide, Muros, Negreira, Oroso, Santa Comba, Santa Comba, Ribeira, Santiago, Vedra, Vimianzo, Allariz, Castro Caldelas, O Baro de Valdeorras, O Carballiño, Ourense, Verín, Xinzo de Limia, A Fonsagrada, Becerreá, Chantada, Foz, Guitiriz, Lugo, Monforte de Lemos, Monterroso, Quiroga, Sarria, Viveiro, A Cañiza, A Estrada, Catoira, Lalín, Marín, Ponteareas, Pontevedra, Redondela, Tui, Vigo e Vilagarcía de Arousa.