Vieiros

O goberno de Sri Lanka debe tenderlle a man á minoría tamil. Esta é a receita que acaba de poñer enriba da mesa a ONU para solucionar o histórico conflito. Ban ki-monn, que está a visitar campamentos de refuxiados, pide que se abra un proceso de reconciliación entre o goberno e os independentistas tamiles.

Aínda que o executivo de Sri Lanka anunciou esta semana a derrota dos Tigres de Liberación da Patria Tamil, logo de case tres décadas de guerra aberta, o secretario xeral da ONU foi claro sobre os pasos a dar: “Agardo que o presidente Rajapaksa e os dirixentes do goberno tendan a man ás minorías para garantir un diálogo completo”.

Dende a ONU afirman que logo de gañar a guerra, o goberno de Sri Lanka ten un un gran reto por diante: “gañar a paz” e evitar que o conflito mude nunha “guerra de guerrillas”. Rajapaksa comprometeuse a buscar un acordo político coa minoría tamil.

As axencias de axuda humanitaria denuncian os obstáculos que está a poñer o exército para a distribución de axuda ás ducias de milleiros de desprazados. O goberno busca a combatentes tamiles entre os refuxiados.

A ONU calcula que no conflito morreron arredor de 90 mil persoas. Diferentes colectivos como Amnistía Internacional piden que se abra unha investigación con garantías para xulgar os crimes de guerra e a violación dos máis elementais dereitos humanos.

Especial BBC sobre o conflito:

• Quen son os Tigres Tamiles?

• Eu fun unha guerrilleira Tamil

• Radiografía de Sri Lanka

• A difícil busca da verdade