Vieiros

A irmandade expresada nas bancadas polos seareiros do FC Barcelona e o Athletic Club de Bilbao, axudou este mércores a darlle cor ao campo valenciano de Mestalla, onde se xogou a final de Copa. Camisetas ou bufandas dos dous equipos mesturáronse en moitas partes do estadio e, da boa sintonía entre as afeccións, deron exemplo os aplausos comúns a xogadores e seareiros rivais.

Mentres, no campo viuse unha feira de goles, que iniciaron os vascos ao pouco de comezada a primeira parte, cando Toquero furou a porta blaugrana meténdolle a cabeza ao balón. De aí para adiante, o Barça botouse arriba até os catro goles e despregou o xogo vizoso que o pon á porta do que sería un histórico triplete de títulos. Por outra banda, chamou tamén a atención o forte trono de asubíos practicado polas dúas afeccións cando entrou El-Rei Juan Carlos de Borbón e ao soar o himno español, anaco que ademais a TVE non transmitiu nun primeiro instante, ofrecendo despois en diferido ese momento.

Recomendámoslles o seguimento especial da final en Vilaweb