Vieiros

Apenas catro días despois do inicio do proceso formal de fusión por "absorción" co que Fenosa pasa a formar parte de Gas Natural, confírmase un dos ruxerruxes da afectación que esta operación no sector enerxético vai ter en Galiza. Deste xeito, e segundo puido saber Vieiros este mesmo luns, a empresa comunicoulle a representantes dos traballadores que a central coruñesa será vendida. Así mesmo, mantense a incerteza sobre a posición na que queda o cadro de empregados.

A Comisión Nacional da Competencia (CNC), estabelecera a necesidade dun programa de desinvestimentos no marco deste proceso de fusión, fixando a esixencia para Gas Natural de desfacerse dun equivalente a 2.000 MW en centrais de ciclo combinado e de uns 600 mil clientes da área de comercialización de gas. Non houbera, até o de agora, información concreta ao respecto da posibilidade de que a central coruñesa fose unha das elixidas, nunha operación financeira pilotada para a empresa catalá por entidades banqueiras estadounidenses. Desde o contorno de Fenosa apuntan o xigante enerxético ruso Gazprom como probábel comprador da central de ciclo combinado de Sabón, de 400 megavatios.

O novo complexo de ciclo combinado de Sabón comezou a funcionar mediado o ano 2008, para substituír a central de fuel levantada por Fenosa en 1967. O investimento superou os 220 millóns de euros.