Vieiros

O presidente dos EUA, Barack Obama pediu pasar páxina sobre un capítulo "escuro e doloroso" da historia do país, logo de que o Departamento de Xustiza fixo público de forma parcial o contido de catro informes oficiais, elaborados entre 2002 e 2005, onde se recollen os argumentos da Administración Bush para xustificar o uso de técnicas de tortura a supostos terroristas.

Obama volveu recordar que unha das súas primeiras decisións foi prohibir o uso destas prácticas como porque "non fan máis seguros" os EUA, e xustificou a publicación dos memoranda asegurando que quere evitar interpretacións "imprecisas" sobre o ocorrido.

Con todo, para o presidente estadounidense non é o tempo dos "castigos" senón da "reflexión", e asegurou que os funcionarios da CIA que levaron a cabo os interrogatorios cumpriron coas súas obrigas "de boa fe".

"Os homes e mulleres do noso servizo de intelixencia traballan con coraxe en primeira liña nun mundo perigoso. Os seus logros non se recoñecen e os seus nomes permanecen no anonimato, mais grazas aos seus sacrificios os estadounidenses están máis seguros", afirmou Obama.

O fiscal xeral, Eric Holder, anunciou que o Goberno defenderá calquera funcionario que poida ser imputado por eses feitos "dentro ou fóra" dos Estados Unidos. "Sería inxusto levalos ante os tribunais por unha conduta que aprobara de antemán o Departamento de Xustiza", declarou.

• Máis información: CNN | New York Times | Fox News

Técnicas de tortura da CIA
Waterboarding: Empregada co fin de simular a sensación de afogamento. Usada en interrogatorios ao suposto organizador dos ataques do 11 de setembro Khalid Sheikh Mohammed.
Insecto: Un insecto inofensivo introdúcese xunto co sospeitoso nunha "caixa de confinamento", mais díselle que pode ser perigoso. Técnica aprobada para Abu Zubaydah, mais non executada.
Walling: O detido é golpeado repetidamente contra unha falsa parede para lle provocar aturdimento.
Privación do sono: Obrígaselle ao interrogado a permanecer de pé até 180 horas continuadas.