Vieiros

A disposición positiva do novo presidente dos Estados Unidos, Barack Obama, a asinar o Tratado de Prohibición Total de Ensaios Nucleares, foi a promesa destacada este domingo en Praga polo mandatario estadounidense durante unha intervención pública diante de varios milleiros de persoas. Un tratado que, de feito, só saíra adiante no momento en que o subscriban ademais dos EUA, países como China, India, Indonesia, Paquistán, Israel, Corea do Norte e Exipto.

Obama suxeriu unha reunión internacional adicada especificamente ao tema da redución do armamento nuclear en todo o mundo e un novo tratado que "poña fin de xeito verificábel á produción de materiais fisíbeis destinados a armamento nuclear". O líder dos EUA referiuse ao "legado máis perigoso da Guerra Fría" e sinalou que "o risco de ataque nuclear aumentou" debido ao aumento no planeta de países con armas atómicas.

Así e todo, Obama recoñeceu o pesimismo ao respecto do desafío de supresión armamentística, afirmando que "se cadra non se consegue durante a miña vida". Ao fío, confirmou que segue adiante o proxecto de escudo antimísiles e, aínda admitindo o "dereito" de Irán a ter enerxía nuclear, definiu a "ameaza iraniana" como un dos argumentos para o despregue dese polémico sistema de mísiles.

Máis información:

• New York Times
• Washington Post