Vieiros

MeteoGalicia, ente dependente da Consellaría de Medio Ambiente, avisa do novo temporal que se aproxima, dando a alerta laranxa por neve en todo o país, xa que a partir desta sexta feira a cota sitúase por riba dos 500 metros. Ademais, haberá mar de fondo en todo o litoral galego.

Esta sexta todo o país ha continuar baixo a influenza das baixas presións, con ventos de compoñente norte que han ocasionar unha importante baixada das temperaturas e da cota de neve, segundo o boletín meteorolóxico. O nivel laranxa, alén da neve -que chegará a acadar os 20 centímetros de grosor, nas zonas de montaña-, refírese tamén ao mar de fondo do oeste, con ondas de catro a seis metros, dende as 00:00 horas desta quinta feira ás 00:00 horas da sexta feira. Na tarde desta quinta feira, as ondas chegarán a ter sete metros nalgunhas puntas no litoral pontevedrés, e oeste no mar coruñés, que diminuirán até os cinco metros na sexta.

A neve comeza a dificultar o tráfico na zona oriental
A media mañá desta quinta feira, a neve estaba a condicionar a circulación na A-52, á altura da Mezquita (Viana) -en ámbolos dous sentidos, do quilómetro 112 ao 120- ; na LU-633 en Pedrafita do Cebreiro (Os Ancares) e na LU-651, á altura de Quiroga (Comarca de Quiroga).

Alén disto, a circulación é irregular na N-525 en Taboadela (Ourense), dirección Benavente, por causa de desprendementos das paredes que bordean a estrada.