Vieiros

Centos de miles de persoas -1,5 millóns, segundo os sindicatos- saíron esta quinta feira ás rúas das principais cidades francesas para protestaren contra a política do presidente, Nicolas Sarkozy, e do goberno do primeiro ministro, François Fillon, (ambos os dous da UMP) e a súa xestión da crise económica.

"Estou farto de que me tomen por parvo", declaraba Alain, un home xa xubilado, ao falar do motivo que o levou a saír á rúa. As centrais sindicais, que convocaron a folga en defensa do emprego, o poder adquisitivo e os servizos públicos, consideraron que fora a maior mobilización de traballadores dos últimos 20 anos.

"É a xente a que está aquí, non só os sindicatos. A pelota está no campo do goberno e da patronal. Ou entramos na negociación e deixan de lles facer pagar a crise aos máis humildes ou asumen o risco dun conflito social grave", advertía un responsábel sindical.

A manifestación parisiense, que partiu dende a Praza da Bastilla e rematou fronte á Opera, reuniu 65 mil persoas, segundo a Policía. En 2006, nunha outra protesta similar, as forzas de seguridade reduciran o número de participantes de 700 mil a 84 mil. Marsella, Lyon, Bordeus, Niza, Lille ou Estrasburgo responderon tamén masivamente á convocatoria sindical.

Sarkozy e o goberno de Fillon, co bafo popular na caluga (11.45 horas)
Oito sindicatos franceses, amparados polas forzas políticas da esquerda, saen unidos á rúa esta quinta feira para protestaren contra a política do presidente francés, Nicolas Sarkozy, e do goberno do primeiro ministro, François Fillon, (ambos os dous da UMP) fronte á crise económica e en defensa do emprego, a protección social e os servizos públicos.

A xornada de folga, que apoia case o 70% dos franceses, está a alterar os servizos públicos, dende os transportes e a educación até os hospitais, pasando polo sector enerxético e a televisión. No entanto, a obriga de avisar con tres días de antelación sobre a intención de apoiar o paro permitiu garantir os servizos mínimos.

Os sindicatos cren que o paro alcanzará unha marca histórica. "Non podemos aceptar que os traballadores sexamos os únicos que pagan as consecuencias da crise. Tamén necesitamos, como os bancos, garantías: mais garantías para a vivenda, para a xubilación...", afirmou Bernard Thibault, secretario xeral do sindicato CGT, nunha entrevista en Le Parisien.

Esta é a primeira gran mobilización social dende o inicio da crise económica e dende a chegada de Sarkozy ao Elíseo, en maio de 2007, mais non é o único desgusto do presidente esta semana. O Partido Socialista (PS) presentou esta cuarta feira na Asemblea Nacional unha moción de censura contra a ineficacia do plan de relanzamento económico e o recorte de liberdades civís, que apoiou toda a esquerda e o centro independente.

Malia que o texto non saíu adiante -os parlamentarios da UMP anularon sen problemas a moción de censura, que só conseguiu 231 dos 289 votos que lle eran necesarios para prosperar-, o Executivo de Fillon saíu un pouco máis erosionado da sesión plenaria un día antes de que Francia se bote á rúa.