Vieiros

Así deuno a coñecer, este domingo, na segunda edición da súa columna Las líneas de Chávez (xogo de palabras que mesturan as 'liñas' políticas e as 'liñas de hit' do béisbol) , publicada en medios impresos venezuelanos, onde sinalou que "aquí na Patria de Bolívar continúa, cada día máis intensa, esta batalla política pola emenda constitucional".

"Preciso é agora redobrar a ofensiva xeral en toda a fronte e por algures. Hoxe domingo 25 de xaneiro, iníciase a cuarta fase da nosa campaña: O Desenvolvemento", anunciou o presidente venezuelano.

Máis adiante, no escrito, lembra que nos seus permanentes percorridos polo país, "desde Barcelona até Cabimas, onde xuramentei dúcias de miles de comités polo Si, pertencentes á Frente de las Misiones Socialistas, até esas rúas, vieiros e bloques da parroquia heroica que é o 23 de Enero,  notei o crecente entusiasmo do pobo venezuelano."

Ademais, fixo un chamado "a todo o pobo, aos partidos da alianza, ás frontes sociais, ás patrullas socialistas, aos comités polo Si, a despregar toda a iniciativa, a creatividade, a alegría, a organización, a maquinaria e a mobilización, hora tras hora, día tras día, casa por casa, rúa por rúa, bairro por bairro, cidade por cidade, nunha xigantesca operación ofensiva, intelixente, apaixonada e razoada".

Chávez referiuse, así mesmo, á necesidade de "pulverizar a poderosa campaña de desinformación que a contrarrevolución continúa lanzando contra o pobo, baseada na permanente manipulación e o engano, nunha infinidade de contos mediáticos de laboratorio, como ese monumento ao absurdo e á idiotez que é o conto da 'reelección indefinida'".

"Cada vez que escoito a un 'pitiyanqui' dicer que a emenda é unha reelección indefinida, lembro a Shakespeare en Macbeth: "un conto contado por un idiota, cheo de son e furia, e que non significa nada", sinalou o presidente Chávez.


Salientou que o termo reelección indefinida non significa ren. "Sinxelamente, a reelección é definida, ou non é. Vexamos: o acto de reelixir significa obrigatoriamente a convocatoria definida a eleccións; a definición dunha data para a votación popular e un exactamente definido período de mandato; a Constitución define os lapsos, de catro a seis anos, para todos os cargos de elección popular. Non existe entón ningunha cousa que se pareza ao que os pitiyanquis chaman reelección indefinida. Reelixir é volver a elixir. Quen aspire a continuar nun cargo de elección popular, ten que someterse ao veredicto do pobo".

Daquela, Chávez perguntouse "Pódese perpetuar alguén no poder se os votantes non o elixen? Por que non pode ser o pobo o que poña e quite gobernos? Por que a oposición teme, como ao diaño, contestar estas simples perguntas? Cal é a razón do seu temor? Eu seino. Témenlle ao pobo, que acordou  como un gran Lázaro colectivo".

Finalmente, propuxo a cada cidadán de Venezuela a "que entre todos, votando Si o próximo 15 de febreiro, logremos perpetuar no poder ao pobo venezuelano, fagamos vitalicio o 'Proyecto Nacional Simón Bolívar' para lograr a plena independencia nacional, coloquemos nun trono eterno ese binomio marabilloso, só posíbel na futura sociedade socialista, a igualdade e a liberdade".