Vieiros

O número de xaneiro da revista Cahiers du Cinema-España realiza a habitual escolma das mellores curtametraxes do Estado. Entre elas destaca dous traballos galegos: O Cazador (Angel Santos) e París #1 (Oliver Laxe).

Nas páxinas 66 e 68 da revista pódese ler a crítica que Carlos Reviriego, Gonzalo de Pedro e Jara Yáñezfan de ambos os dous filmes. De París #1 escriben "O empeño do documental en desintegrarse e impregnar (ou impregnarse de) outras formas cinematográficas, fano evidente traballos máis extremos, como Paris # 1, de Oliver Laxe, que recorre á rodaxe en 16 mm como camiño para unha particular arqueoloxía experimental sobre o tempo e a paisaxe galega ameazado pola escura sombra do lume devastador".

Mentres, de O Cazador dise "ábrese en canal e pon ao descuberto o entramado dunha adaptación á pantalla do relato homónimo de Chéjov, desde a súa lectura á súa representación, nun sobrio exercicio de invención creativa que baixo a súa aparente sinxeleza oculta varias capas de lectura. Así, esta pequena xoia atrapa as fases de transformación dunha historia desde que é papel até que é imaxe".