Vieiros

O Xacobeo non deixa de traballar na preparación do vindeiro ano e, nesta liña, decidiu ampliar os eidos de traballo con vistas a mellorar o rendemento e tamén a saúde dos seus deportistas. Con esta intención traballou as pasadas semanas en colaboración co grupo de investigación HI-22, pertencente á Faculdade de Ciencias da Educación e do Deporte, da Universidade de Vigo. O traballo consistiu en probas realizadas mediante estímulos eléctricos, coas que se avaliou o equilibrio dos grupos musculares, para así poder realizar recomendacións individualizadas.

O estudo estivo dirixido por Xosé María Cancela Carral, decano da Faculdade; coordinado por Óscar García; e supervisado polo preparador físico do Xacobeo, Roberto Carballido. Este traballo é pioneiro a nivel nacional, e con el o Xacobeo conforma unha das maiores bases de datos existentes dentro do ciclismo estatal.

Os resultados permitirán mellorar o rendemento dos ciclistas e tamén traballar na prevención de posíbeis lesións. Este aspecto ten especial importancia, xa que se pretende que os datos acadados permitan mellorar a saúde do deportista incluso despois de rematar a súa carreira profesional, evitando posíbeis secuelas.

O estudo é o primeiro paso dun convenio de colaboración entre a universidade e o equipo ciclista, que se atopa agora en fase de xestación. Este acordo permitiría ao equipo ciclista seguir traballando na optimización do seu traballo e á universidade ampliar a súa base de datos referentes ao deporte de elite.