Vieiros

O caso está protagonizado pola construtora Eshor, con sede en Fene. En 2008, a empresa accedeu a unha inxección de cartos públicos no marco do programa de reindustrialización para Ferrolterra, o Plan Ferrol. Co compromiso de crear 4 postos de traballo para unha planta de fabricación de pezas de formigón polímero, a instalar no Concello de Cabanas, ingresou 242 mil euros.

En convocatorias anteriores xa recibira outras axudas do Ministerio de Industria, solicitadas ben a través da empresa principal ou desde outras compañías inseridas no mesmo grupo empresarial. Coa promesa de 7 postos de emprego para unha máquina concreta recibiu 31 mil euros en 2007, e asegurando a creación doutros 8 empregos, ingresou en 2006 dúas axudas respectivas de 129 mil e 169 mil euros. Así, suma en créditos recibidos desde o goberno español, un total de 572 mil euros. No último exercicio, a empresa pechou contas cunha facturación de 54 millóns de euros e un equipo de 600 persoas.

Paradoxalmente, e apenas un mes despois de ingresar os últimos 242 mil euros, Eshor presentou ante a delegación provincial da Consellaría de Traballo un Expediente de Regulación de Emprego (ERE) de extinción que implica o despedimento de 150 traballadores dos 352 que conforma o equipo. A empresa xustifica a iniciativa argumentando que "carece de obra nova para 2009". Co fío destes números, a CIG considera que se podería probar que existiu "mala fe" por parte da construtora. "Pretenden conseguir a axuda do Ministerio para indemnizar os traballadores que causan baixa no ERE presentado", denuncian.