Vieiros

O pesqueiro galego José Almuíña naufragou a mañá do xoves no Océano Atlántico, a mil millas ao leste das illas Bermudas. O palangreiro de superficie, con baseen Vigo, levaba na súa tripulación tres galegos e nove indonesios. Un mercante estadounidense xa rescatou seis dos tripulantes.

Segundo informou Salvamento Marítimo, o buque localizou os traballadores a bordo dunha balsa. O José Almuíña, de 26,6 metros de eslora, dedicábase á captura de peixe espada e os seus armadores son da Guarda, aínda que agrupados na Cooperativa de Armadores de Vigo.

Segundo o censo do Ministerio de Medio Ambiente, Medio Rural e Mariño, o barco ten autorización para traballar en augas do Estado Español e comezou a actividade en 1968.

O operativo de busca da tripulación do pesqueiro estao a levar a cabo o centro de coordinación de Salvamento Marítimo de Norfolk (Virxinia, EUA). O centro comezou os labores despois de recibir a alerta da radiobaliza do pesqueiro galego. Tamén as instalacións de Norfolk foron as encargadas de mobilizar os mercantes máis próximos ao lugar do accidente.