Vieiros

"Eu non lle son o presidente Bush", defendíase este mércores o candidato do Partido Republicano, John McCain, ao respecto das acusacións do seu rival, "se vostede quería competir con Bush debería terse presentado hai catro anos". O novo líder republicano trata así de poñer distancia entre el e a herdanza complicada de tirar de enriba que lle deixa o actual presidente dos Estados Unidos.

Mentres, o candidato do Partido Demócrata, Barack Obama, seguía disparando a esa ferida, lembrando que McCain votou a prol de catro dos cinco orzamentos de Bush. Coa crise económica monopolizando o interese cidadán, insistiu Obama en que o republicano "apoia as mesmas políticas que está levando a cabo Bush, en enerxía, taxas e prioridades orzamentais". Segundo as primeiras enquisas logo do debate entre os dous candidatos, Obama mantén ampla vantaxe sobre McCain nas preferencias do electorado.