Vieiros

Máis de 120 millóns de habitantes do Brasil votaron nos recentes comicios locais, en primeira e segunda volta, de xeito electrónico, como levan podendo facer dende hai unha década. Pero a principal característica das máquinas de votación é que funcionan mediante Linux.

O feito de usar software libre posibilitou que expertos informáticos de cada partido puidesen previamente controlar e revisar todo o software da máquina, da que se distribuíron 430 mil unidades por todo o país.

Os dispositivos comezaron usando o sistema operativo VirtuOS, dende 1996, pero, por problemas de licenzas, pasáronse no ano 2002 ao Windows CE. Finalmente, en 2004 decidiuse reducir custos e pasarse a Linux. As próximas previsións son que se poida identificar o votante mediante as súas pegadas dixitais nos comicios de 2012.

O goberno do Brasil ten na web unha aplicación java que permite experimentar o voto electrónico dende o navegador de internet. As candidaturas foron substituídas por partidos inventados, que contan con personaxes históricos brasileiros nas súas listas.