Vieiros

A selección galega xogaba onte, sen pisar sequera o parqué do pavillón de Reus, o pase a cuartos de final do I Mundial Feminino de Fútbol Sala.

O conxunto galego perdera un partido (contra Rusia, 3-2) e gañara outro (contra Ucraína, 5-4); daquela, para saber se pasaba de fase tiña que agardar a coñecer o resultado do encontro que enfrontaba, esta cuarta feira de tarde, ás rusas e ás ucraínas entre si.

Finalmente, Rusia superou o conxunto ucraíno por 4 a 2, quedando primeira de grupo, e Galiza pasou á seguinte fase. As irmandiñas terán que se enfrontar, a vindeira sexta feira 3 de outubro ás 17:30 horas, a Arxentina, unha das seleccións máis potentes, que chegou a cuartos como primeira de grupo, vencendo a Bélxica por 1-8 e a Venezuela por 2-6.