Vieiros

De linguas minorizadas entenden moito en Gales, e de aí o seu interese en achegarse á cultura e ao idioma galego. Unha oportunidade téñena no Centro de Estudos Galegos de Bangor, onde poden aprender nocións da nosa lingua, historia e narrativa galega contemporánea. No que vai de ano, o centro, que dirixe Helena Miguélez Carballeira, organizou un bo número de actividades, entre as que se atopan recitais, presentacións, conferencias ou mesmo un congreso internacional.

Visitas de Chus Pato ou María do Cebreiro
Un destes actos foi unha xornada sobre poesía e tradución, que contou coa presenza da canadense Erín Moure e a escritora ourensá Chus Pato. Ambas falaron da dinámica de traducir en diferentes linguas, da literatura galega e mesmo ofreceron un recital poético bilingüe que atraeu a numerosos interesados ao Drama Rehearsal Room universitario. Ademais, tamén nestes últimos meses inaugurouse a Residencia de Escritores Galegos coa estadía de María do Cebreiro Rábade Villar. A poeta e profesora da Universidade de Santiago aproveitou a súa estadía para participar en Aberystwyth nunha conferencia sobre linguas minorizadas nun man a man coa tamén poeta e profesora universitaria Menna Elfyn ou para participar dun recital musicado onde cantou algúns dos seus propios poemas.

Entre outras actividades tamén se celebrou un congreso internacional en colaboración coa Universidade de Liverpool "Saíndo da nación: máis aló do nacional na produción cultural galega contemporánea". Alí, investigadores e artistas de diferentes partes do planeta reuníronse para falar sobre a literatura galega contemporánea e sobre os novos espazos teóricos e creativos que esta ocupa. Ademais, os alumnos que quixeron achegarse até Galiza tiveron a súa oportunidade coa participación en cursos de verán de lingua e cultura galega para estranxeiros levados a cabo en Santiago de Compostela.