Vieiros

Unha investigación da Universidade da Provenza, publicada pola revista New Scientist, asegura que os pobos que formaron parte do Imperio Romano son máis vulnerábeis a contraer o VIH, virus que pode provocar a sida.

Segundo os investigadores provenzais, nos territorios que dependeron de Roma hai case dous milenios, é menos habitual unha variante xenética que protexe contra o virus. Esa zona inclúe a área mediterránea e mais Inglaterra. O equipo da universidade atopou unha relación entre a frecuencia da variante e os límites do imperio.

Ademais, as zonas que estiveron máis tempo baixo goberno romano, como Italia, Grecia ou o actual Estado Español, contan só con entre o 0 e o 6 por cento de frecuencia do xene CCR5-delta32, que protexe parcialmente fronte ao VIH.

En territorios nos bordos do imperio, como Alemaña ou Inglaterra, a taxa anda entre o 8 e o 11,8%, mentres que en países que nunca foron romanizados, a prevalencia é máis alta.

Segundo estes investigadores, a diferenza xenética non se debe á descendencia que tiveron os soldados romanos coa poboación local, senón máis ben a algún tipo de infección introducida por eles á que a xente co xene era especialmente sensíbel.

Porén, non todos están de acordo. Científicos da Universidade de Liverpool concédenlle este papel á Peste Negra, que provocou numerosas mortes en Europa durante e despois da invasión romana. Suponse que a xente con esa variante xenética que a fai máis sensíbel ao VIH facíaa, pola contra, máis resistente á peste.