Vieiros

Tras a súa exhibición, o pasado mes de xullo, no teatro "O Moroco" de Broadway durante a 9ª edición do New York Internacional Film Festival (NYILFF), O neno de barro, de Jorge Algora, foi novamente seleccionada para participar na sección oficial dun dos festivais con máis tradición de Latinoamérica, na XXV edición do Festival de Cinema de Bogotá (FIAPF), que se celebrará do 1 ao 9 de outubro. Colombia será o undécimo país americano no que se exhiba esta longametraxe de coprodución galego-arxentina, que xa percorreu 32 festivais de todo o mundo, incluíndo China, Australia ou os países de Europa do Leste e que leva obtidos 13 premios.

Pola súa banda A flor máis grande do mundo foi seleccionada para ser proxectada no 1º Congreso de Cultura Iberoamericana que terá lugar en México do 1 ao 5 de outubro. A curta representará ao Ministerio de Cultura portugués co congreso. A curta viaxará tamén ao Festival Internacional de Animación de Rumanía ANIM'EST 2008 que se celebrará en outubro. Alí tamén estará outra produción de animación de Continental, a longametraxe De Profundis, dirixida por Miguelanxo Prado con música de Nani García.

Así mesmo, Maldito Bastardo, a primeira longametraxe do compostelán Javi Camino, participará no Dark Carnival Film Fest, un dos principais festivais de cinema de terror independente de Estados Unidos. O evento celébrase entre o 16-21 de setembro en Bloomington (Indiana). Finalmente, as curtas 'Sen saída' e 'Rainy Day', de Andrés Victorero, foron seleccionadas no Toronto Urban Film Festival (TUFF), que ten lugar en setembro.