Vieiros

Esta segunda feira estrearase o Proxecto Gavea 2008 de vela adaptada para persoas con discapacidade, coa participación dos nove pasaxeiros do veleiro Laion, que navegarán na primeira etapa da X Volta Náutica a Galiza.

Dos nove tripulantes do Laion, que navegará entre Laxe e Camariñas, dous son monitores, cinco son participantes con algunha discapacidade os outros dous, voluntario da Cogami (Confederación Galega de Persoas con Discapacidade), entidade organizadora do Proxecto Gavea, que farán tarefas de acompañamento dos participantes.

O veleiro Laion
O veleiro Laion conta cunha serie de adaptacións para facer practicábel a navegación, como unha grúa instalada en botavara, que permite o embarque e desembarque das persoas con discapacidade, directamente dende o pantalán ou o peirao. Tamén contan cun control centralizado que se activa a través dun pulsador, para que calquera persoa poida gobernar o barco.

O barco, de 13 metros de eslora, foi incautado ao narcotráfico e, posteriormente, cedido á Asociación de Discapacitados da Bisbarra de Muros (Adisbismur), membro de Cogami. Dende aquela cumpre a función de axudar á integrar socialmente ás persoas con discapacidade a través do deporte.