Vieiros

O equipo da Universidade de Aveiro foi o gañador do campionato do mundo de fútbol robótico, que se disputou en Suzhou (China). O grupo Cambada (Cooperative Autonomous Mobile roBots with Advanced Distributed Architecture) gañou o título mundial na liga de tamaño medio, na que se enfroutou a trece equipos de todo o mundo.

A competición consistiu no enfrontamento de dous equipos de seis robots autónomos nun campo de fútbol de 18 por 12 metros. Os 'futbolistas' miden até 80 centímetros de alto e pesan até 40 quilos, e forman parte de investigacións sobre visión artificial, control dinámico, intelixencia artificial, fusión sensorial e cooperación robótica.

Cambada conseguiu o primeiro lugar fronte á holandesa Tech United de Eindhoven e a alemá Braistormers Tribots. Os portugueses gañaron 11 dos 13 partidos, e os que perderon fixérono pola mínima. A final saldouse con 7 goles a 1 fronte a Tech United.

O equipo Cambada formouse en outubro de 2003, segundo informa Ciência Hoje, a partir dun grupo de docentes e investigadores do Instituto de Engenharia Electrónica e Telemática de Aveiro. Antes de seren campións do mundo xa acadaran o segundo título de campións nacionais nun festival que tivo lugar en Aveiro en abril.