Vieiros

O vigués Toni Ferreiro acariñou o ouro e o Campionato de Europa de descenso en Bicicleta de Montaña esta fin de semana en Valmalenco-Caspoggio (Italia), mais ao final, despois dunha pelexa pola primeira praza, tivo que se conformar coa terceira e coa medalla de bronce que, por outro lado, o introduce de cheo na loita continental da modalidade, cos mellores ciclistas de Europa.

Ferreiro fixo o percorrido nun tempo de 2,37,60, mentres que o gañador, o francés Remi Trillón gañou a medalla de ouro con 2,35,18 (fora bronce na última edición do Campionato). A prata foi para o austríaco Boris Tetzlaff.

O técnico da selección estatal, Cristóbal Sánchez amosouse contento e nada sorprendido polo podio de Ferreiro: "Como sempre Toni estivo moi tranquilo, cunha baixada moi regular e só tivo algún problema nunha parte moi difícil, cara o final".