Vieiros

Dentro da campaña de Greenpeace para promover políticas respectuosas co ambiente entre as empresas tecnolóxicas, xorde Clash of the Consoles (choque de consolas). A ONG afirma que este tipo de aparellos destinados ao entretemento supoñen un dos mercados de maior crecemento a electrónica de consumo, con máis de 60 millóns de unidades vendidas e un 14% de aumento o ano pasado. As consolas conteñen produtos químicos tóxicos e poden contribuír ao aumento do lixo electrónico, que en moitos casos non se recicla axeitadamente, provocando problemas de contaminación e de saúde.

Greenpeace fixo unha comparación entre a X-Box de Microsoft, a Wii de Nintendo e a PS3 de Sony tendo en conta factores como as iniciativas dos fabricantes para aproveitar os residuos perigosos, ou o uso de materiais alternativos menos contaminantes. Infelizmente, salienta a ONG, aínda que no mundo dos computadores se está a avanzar na fabricación de aparellos máis limpos, isto aínda non acontece coas consolas.

Das tres consolas analizadas, a que sae peor parada é a Wii. O informe di do seu fabricante, Nintendo, que carece dun plan de eliminación de residuos tóxicos nin de reciclaxe. Porén, destaca como positivo que a Wii é a máis eficiente enerxeticamente das tres analizadas. A de Microsoft consome máis, pero a empresa ten unha política de eliminación de produtos tóxicos até 2011. Pola súa banda, a PS3 é a que 'chucha' máis enerxía, aínda que Sony destaca por ter un bo programa de reciclaxe de materiais.