Vieiros

Recuperándose aínda do tremendo impacto da inmersión nómade no oasis de Ledoira da Conferencia NorOeste, a LNB "coma os cans que osman o bo tempo", encerou as táboas e enfundou os traxes de neopreno para este domingo desafiar as leis da gravidade, máis ca nunca, surfeando polas paredes dos furanchos en Xil, a parroquia máis brava do Concello de Meaño.

Xil recibe, despois de 2 anos, aos fillos da LNB e faino ao grande, cunha competición con visos de ser eterna: a Copa Salnés. Nesta hanse dar cita, nunha mesma pista, as estrelas deste deporte, a partires das 16:00 horas. O enfrontamento: entre a Conferencia Sur e un Combinado do Norte. Despois do partido vai haber un, xa clásico, concurso de varados no que se xoga un saboroso xamón.

Porque... quen dixo medo? En tal caso fame...
Nin a Copa de Europa nin a ensaladeira de Wimblendon se pode comparar ao espectacular e cegador brillo que desprende esta obra de arte construída no Sur polos grandes artesáns da LNB, dirixidos polo poderoso mestre Rubén Otero.

A Copa Salnés agarda xa a que os equipos do Norte e do Sur invadan a pista de Xil para tentar levala a un dos hemisferios en loita. Mentres a gran tribo do Sur entoa o You'll never walk alone para amedrentar ao tenso Norte, este agarda coma un gato agochado entre os ramallos a que dean as 16:00 horas do domingo para lanzarse sobre a súa presa na pista da capela das Angustias. O viños dos furanchos ferve nos barricas desexando saber que beizos bicarán a copa e beberán o seu líquido. Insistimos... máis angustiosa espera , imposíbel!

A folla de ruta
Este histórico enfrontamento está organizado pola Taberna da Cancela (que xa ten recrutado a varios palanadores e palanadoras locais, listos para sumarse ás grandes estrelas do sur, encabezadas polos finalistas do Aberto de Mos, Josué e Chupi, e Xosué Miguel, o gladiador de Ourense), xunto coa LNB.

A saída do norte será as 8:30 horas da Estación de Ribadeo, coas recollidas habituais e con posíbel parada en Compostela. Ao mediodía chegarase a Xil, para encontrarse na Taberna da Cancela. Quince minutos máis tarde comezará un percorrido guiado polos furanchos. Ás 14:30 horas haberá un xantar de irmandade e ás 16:00 comeza o torneo. Polo xamón xógase ás 18:00 horas, e a cada cacho O Varal Morse vai dar o pulso directamente dende a pista das Angustias.