Vieiros

Desde o pasado 5 de febreiro, no coñecido como primeiro supermartes, a senadora Hillary Clinton non volvera gañar en ningún dos estados onde o Partido Demócrata celebrara eleccións primarias. Co reconto aínda sen rematar no momento de escribirmos estas liñas, parece confirmado que Clinton conseguiu o triunfo en Ohio, co 55% dos votos fronte ao 43% de Obama, e en Texas, neste caso por só un 51% diante do 47% de Barack Obama.

"Esta é unha vitoria para aqueles que tropezaron e conseguiron levantarse, para aqueles que traballan duro e nunca se renden", expresou a senadora durante a súa primeira intervención da noite. Clinton destacou especialmente o triunfo en Ohio, indicando que é un estado que marca tendencia cara ao final, xa que ningún candidato que non gañase aló chegou posteriormente á presidencia dos EUA.

Os resultados deste martes outórganlle un respiro á senadora, que podería seguir así na carreira, malia que con probabilidade aínda seguirá un chisco por baixo de Obama na suma total de delegados. Así e todo, nos últimos días a prensa estadounidense xa se facía eco dos movementos no interior do Partido Demócrata para forzar a súa renuncia en favor de Obama no caso de que non conseguise vitorias claras, como é o caso.

Recomendámoslles ampliar no especial do New York Times.