Vieiros

As transaccións na web especializada en poxas eBay caeron un 13% durante a última semana. Nestes sete días, moitos vendedores decidiron boicotear o portal para protestaren polo aumento das comisións que lles cobra a empresa. Segundo as estimacións efectuadas por medios de comunicación dos EUA, na última semana só se poxaron 13 millóns de artigos, despois do boicot que comezou o 18 de febreiro.

Porén, eBay negou que a protesta tivese impacto nas súas vendas e rexeitou volver ao antigo sistema de comisións e de votacións. O portal aumentou as comisións que lles cobra aos vendedores cada vez que se pon na web un dos seus artigos. Ademais, os usuarios deixarán de poder facer comentarios negativos sobre compradores a partir de maio.