Vieiros

A castaña, a torta de Santiago e catro especies de pemento (Arnoia, O Couto, Oímbra e Herbón) terán a posibilidade de obter un distintivo que garanta a súa orixe e recoñézase a súa calidade e autentificación. Medio Rural destacou que este selo "evitará prácticas fraudulentas" e contribuirán a "non confundir ao consumidor respecto da procedencia do produto". Estes seis produtos poderán optar a alcanzar distintivos como Denominación de Orixe Protexida ou Identificación Xeográfica Protexida (IXP). Neste último caso, trátase do Pemento de Herbón, cultivado fundamentalmente no concello coruñés de Padrón e nalgunhas zonas da provincia de Pontevedra; ou de Oímbra e o de Arnoia, pertencentes ás localidades ourensás do mesmo nome e o de Couto, enmarcado na comarca de Ferrolterra.

Así mesmo, Medio Rural anunciou que os produtos agroalimentarios galegos contarán con máis de cinco millóns de euros destinados a "promover e divulgar" entre a cidadanía o seu consumo mediante diferentes campañas nas que se destacará a calidade e a procedencia artesanal destes alimentos. Medio Rural explicou que a asignación desta partida orzamentaria responde á iniciativa da Xunta de "apostar" e "difundir" os alimentos galegos de "calidade".