Vieiros

Aqueles que estean interesados en viaxar na aeronave 'SpaceshipTwo' deberán pagar ao redor de 137.000 euros e poderán experimentar a gravidade cero durante cinco minutos.

A compañía Virgin Galactic está preparando unha nave que levará turistas ao espazo en 2009. Aínda que aínda é unha maqueta, os deseñadores aseguraron que o 60% da nave xa está finalizada.

Así mesmo, esperan que os voos comerciais comecen a finais do 2009, tras levar a cabo as viaxes experimentais.

Segundo declarou Richard Branson, o propietario de Virgin Galactic, o 2008 será "o ano da nave espacial" e, ademais, mostrouse "realmente emocionado" coas oportunidades que pode traer este novo sistema.

Xa hai uns 200 clientes dispostos a embarcar no 'SpaceshipTwo'. Todos eles deberán embolsar ao redor de 137.000 euros.

Na viaxe espacial, a nave nodriza alcanzará os 15 quilómetros de altura e liberará ao 'SpaceshipTwo'. Nese momento, acenderanse os seus propulsores e acelerará á aeronave a unha velocidade de 4.000 kilometros por hora.

Dese modo, os seis tripulantes e os dous pilotos da nave converteranse en astronautas e poderán experimentar a gravidade cero durante cinco minutos.