Vieiros

Coas sondaxes prognosticando o éxito do Partido Demócrata nas próximas presidenciais dos EUA, Iowa parece ir ser escenario chave da loita. Este mércores rematou a campaña. Agora, realízanse as asembleas onde se votará o candidato dos partidos.

As enquisas ao respecto indican estreitas diferencias entre todos eles. No caso dos demócratas, un estudo encargado por Reuters sinala que Hlillary Clinton e Barack Obama aparecen destacados co 28% das preferencias, seguidos moi cerca por John Edwards, cun 26% dos apoios. Con todo, a enquisa encargada por un xornal local, Des Moines Register, fía máis polo miúdo os datos e prognostica a vitoria de Obama, co 32% dos votos, fronte ao respectivo 25 e 24% de Clinton e Edwards. O informe considera que Obama seduciu especialmente o electorado independente e prognostica que unha alta participación favorecería a súa candidatura.

No lado dos republicanos, a loita de Iowa semella non ir ser tan decisiva coma no bando demócrata. Así, un dos candidatos máis destacados, Rudolph Giuliani, ex alcalde de Nova York, non aparece entre os favoritos neste estado onde sabedor desa perspectiva realizou tamén unha pouco ambiciosa campaña. Con todo, si haberá pistas dos que poden destacarse a pé del, caso de Mike Huckabee, ex gobernador de Arkansas, ou Mitt Romney, ex gobernador de Massachussetts, os dous candidatos aos que a enquisa de Reuters lles outorga o papel de favoritos.

As webs oficiais dos candidatos do Partido Demócrata:

• Barack Obama
• Hillary Clinton
• John Edwards
• Bill Richardson
• Dennis Kucinich
• Joe Biden
• Christopher Dodd
• Mike Gravel

• Rudolph Giuliani
• Mike Huckabee
• John McCain
• Mitt Romeny
• Fred Thomson
• Duncan Hunter
• Ron Paul

• No Washington Post
• No New York Times