Vieiros

O incremento da valoración que os cidadáns fan de detalles coma a etiquetaxe sobre o grao de consumo enerxético á hora de mercar electrodomésticos, ou a suba na utilización de lámpadas de baixo consumo, son dous datos que permiten ser optimistas a medio prazo. Explicouno este luns Luís Díaz, delegado en Galiza de Unión Fenosa, durante a presentación do informe sobre o índice de eficiencia enerxética no fogar en 2007. De xeito concreto, un fogar calquera podería conseguir un aforro de até o 9,93% no recibo a través de prácticas coma estas contra a dilapidación enerxética.
"Non evolucionamos practicamente no aforro", sinalou Díaz, repasando os catro eixos analizados no estudo: equipamento, cultura enerxética, control enerxético e mantemento. Referiuse ademais a un factor adicional, as medidas que poden aplicarse na edificabilidade das vivendas e que levarían a dobrar esa posibilidade de aforro até o 20% por fogar. A este respecto, Xosé Ramón Doldán, director do Instituto de Enerxía de Galicia, INEGA, recordou que Galiza será "pioneira" coa introdución do certificado enerxético nos edificios, presentado esta mesma semana.