Vieiros

A estampa branca e rosada dos flamengos coas súas longas patas pousando nas augas, fixeron famoso este recanto privilexiado de África. Á beira dese reclamo veuse desenvolvendo unha crecentemente próspera actividade no ámbito do ecoturismo, ofrecendo novas oportunidades para o desenvolvemento sustentábel da zona.

Pero a beizón do goberno á construción dunha planta química no contorno deste lago ameaza as oportunidades creadas. Colectivos ambientalistas, como BirdLife International, e do ámbito empresarial turístico, como a Asociación Africana de Turismo, expresaron xa a súa preocupación por un proxecto que en primeiro término podería causar a extinción das tres cuartas partes da poboación mundial de flamengos e que frearía o potencial turístico desta área. En apenas cinco anos, Tanzania duplicou o número de turistas que recibe cada ano, e o propio Lago Natron aparece como un dos principais atractivos do país.