Vieiros

A asociación de veciños de Oza-A Gaiteira-Os Castros é a organizadora da concentración deste xoves, ás 20h., diante da sede da Autoridade Portuaria da Coruña. Aló insistirán na solicitude de dimisión do seu presidente, Macario Fernández-Alonso pola súa actuación ante os problemas causados polo carbón en combustión aloxado na Medusa do porto coruñés. Os veciños tamén piden que haxa descargas "limpas", laiándose de que cada vez "a cousa vai a peor" en relación á contaminación causada pola actividade portuaria.

O PPdeG coruñés apoiará a concentración, e o seu voceiro, Carlos Negreira, aproveitou para queixarse de que o alcalde "non tivo nin media hora na súa axenda" para reunirse cos afectados e explicarlles "de forma clara e transparente" o que pasou. Criticou Negreira que nesta altura aínda non estea claro se "se trata dun problema puntual ou estrutural" e de cales foron as súas consecuencias.

O grupo municipal do BNG tamén apoia a acción dos veciños. Aló estarán ademais representantes de Esquerda Unida, dos sindicatos UXT, CIG e CCOO, do colectivo ecoloxista Adega e doutras asociacións.