Vieiros

Máis de 400 persoas participaron nas 12 modalidades do concurso GZcrea, que abrangue actividades tan diversas como o graffiti, a música, a moda ou a videocreación. En total, foron 124 os participantes que presentaron os seus traballos na sección de artes plásticas, facéndose moi complexa a selección dos 26 traballos expostos. O director xeral de Xuventude, Rubén Cela, destacou que actualmente en Galiza existe un gran número de mozos e mozas "cun gran potencial creativo, e este certame vén a consolidar un espazo no que xutar todo ese potencial".

O Director Xeral de Xuventude da Xunta, Rubén Cela e o concelleiro de Cultura compostelán, Néstor Rego, foron os encargados de inaugurar a exposición GZcrea de artes plásticas 2007, que poderemos visitar até o 20 de decembro na Zona C de Compostela. Na mostra pode verse unha selección das mellores obras presentadas ao concurso, entre as que se atopan as gañadores dos tres premios que outorga o certame e que resultaron ser Iván Prieto, primeiro premio coa súa obra Silencio, Víctor Hugo Costas, que se fixo co segundo con Nos, da serie arqueoloxía vertical; e Lara Pintos, gañadora do terceiro premio con Neo existencial.

O concurso vén a demostrar que actualmente a mocidade galega ten tamén uns valores fortemente marcados, e o GZcrea "serve de punto de encontro para fomentar eses valores e levalos máis alá das nosas fronteiras", segundo afirma Rubén Cela.

Espazo para a mocidade creadora
A exposición encaixa perfectamente nos obxectivos que o Concello ten marcados para a Zona C. Segundo o concelleiro de Cultura, Néstor Rego, esta sala naceu para "estar ao servizo dos novos creadores composteláns, e para dar cabida á enorme capacidade creadora da nosa mocidade". Rego comentou ademais que a sala "está a converterse nunha magnífica forma de contribuír á creación da cultura de Galiza como país".

Dende a Concellaría de Cultura compostelá tamén se quixo remarcar que este espazo estará sempre ao dispor de todos aqueles mozos e mozas que teñan arelas creadoras, e que ten como obxectivo o de contribuír "a abrir posibilidades nas artes plásticas do noso país".