Vieiros

As carencias en canto á descripción de especies animais e vexetais son notables. En canto a plantas somentes se citan especies como: silvas, xestas, carballos, é dicir que nin tan sequera tiveron que desprazarse até o lugar xa que estas plantas aparecen practicamente en calquera parte de Galiza.

En canto aos animais cabe destacar (aparte da ausencia total de peixes) o escaso número de especies enumeradas. Dentro das especies enumeradas no estudo aparecen 5 especies protexidas polo Catálogo Galego de Especies Ameazadas, sen embargo non se advirte que estean protexidas nin pola lexislación galega nin polos convenios internacionais de Berna ou Bonn. Destas 5 especies, 4 son anfibios e a outra un morcego, os anfibios son enormemente sensibles á alteración do seu hábitat.

Ademais o “caudal ecolóxico” calcúlase do seguinte xeito “en base á metodoloxía francesa o caudal que debe circular é do 10% do caudal anual”. Esta é a xustificación exposta para detraer o 90 % do caudal do río Tronceda á canle de derivación. Resulta pueril pretender facer unha regla de tres sen ter conta de: variacións estacionais, interanuais, especies afectadas, etc para establecer o caudal ecolóxico. Con estas afirmacións o que se pode garantir é unha grave afectación para o ecosistema do río Tronceda.

ADEGA puxo en coñecemento do Colexio Oficial de Biólogos (COBGA) o devandito estudo de efectos ambientais realizado polo enxeñeiro de Camiños, canais e portos D.Gerardo Miguel López Roibás, para o emprendimento de accións necesarias para esixir cando menos a capacitación curricular para a realización de estudos ambientais.