Vieiros

Alén das concentracións previstas para este mércores, entre as 12 e as 13h, na Porta do Sol de Vigo, que podería incluír unha manifestación polas rúas da cidade, os traballadores do sector da construción na provincia de Pontevedra acordaron tamén desprazárense durante esta xornada até a comarca do Deza. Aló tratarán de paralizar as obras na liña de alta velocidade ferroviaria. Ao longo da semana, e despois de subliñar que o paro ten un seguemento completo nas cidades, estenderán principalmente as reivindicacións a algunhas comarcas onde o impacto inicial da folga foi menor.

De xeito paralelo, este martes a Consellaría de Traballo propoñíalle ás partes en conflito unha mesa de negociación onde Traballo actuaría como mediador. Desde a patronal amosáronse dispostos a sentar de xeito inmediato, malia que consideran que neste momento é difícil que se vaia chegar a un consenso. Por parte dos traballadores, o secretario da Federación de Construción de CIG en Pontevedra, Xaquín Agulla, dubidaba da vontade de diálogo dos patróns e chamaba aos empresarios da construción a faceren "un exame de conciencia e presentar unha oferta de convenio digna, acorde cos enormes beneficios que se veñen xerando sen que até o de agora repercutiran sobre os traballadores".