Vieiros

A marcha a pé en solidariedade cos veciños contrarios ao Plan de Emerxencia Exterior de Reganosa, encerrados dende hai un mes na casa do Concello de Mugardos, concentrou este venres un importante número de persoas ao seu inicio, no porto ferrolán de Curuxeiras, entre as que se atopaba a primeira tenente de alcalde de Ferrol, Iolanda Díaz.

Os integrantes, máis dun cento aos que se lles foi sumando xente a medida que avanzaba a comitiva, tiñan previsto chegar a Mugardos ao redor das 20.30 horas, segundo informou o voceiro do Comité Cidadán de Emerxencia para a Ría de Ferrol (CCE), Carmelo Teixeiro. Ademais, esperábase que en Fene se adherise outro abundante grupo de persoas.

Competencia do goberno español
Namentres, dende a Xunta, o conselleiro de Industria, Fernando Blanco, aseguraba este mesmo venres pola mañá que a planta de Reganosa conta con "todos os requisitos legais" para permanecer aberta, tal e como "sinalou o goberno central" que "é quen ten a capacidade para autorizar a súa apertura".

Neste senso, Blanco explicou que dende a consellaría que el dirixe, as competencias se limitan ao plan de seguridade interior, que tamén "se está a desenvolver de acordo aos requisitos legais" correspondentes.

Zapatero na Fonsagrada
Por outra banda, unha representación dos veciños que permanecen encerrados no Concello de Mugardos viaxará á Fonsagrada, onde o presidente do goberno español, José Luis Rodríguez Zapatero, acudirá a un xantar-mitin.

O seu obxectivo é que o mandatario "tome conciencia", coa súa presenza, dos "perigos aos que ten exposta á poboación que vive na ría de Ferrol", e rememorarlle a frase que "un galego lle berrou cando gañou as eleccións: Zapatero, non nos falles!".