Vieiros

A cuarta xornada das décimas Viñetas dende o Atlántico contará coa presenza de tres expoñentes da banda deseñada estatal. Juanjo Sáez, Sergi San Julián e Santiago Valenzuela participarán nun encontro cos afeccionados a partir das oito do serán.

Media hora antes, a Asociación Galega de Profesionais da Ilustración (AGPI) fará a súa presentación pública, xusto despois de que se dea a coñecer unha monografía da USC sobre banda deseñada galega. As presentacións e as charlas terán lugar no Quiosco Alfonso.

Juanjo Sáez, gañador do primeiro premio do Festival de Publicidade de San Sebastián, foi tamén galardoado con dous premios Junceda, ao mellor libro para adultos por Vivir del cuento e á ilustración multimedia, pola web do proxecto Educalia. É autor, ademais, de Buenos tiempos para la muerte e do libro infantil Dentro del sombrero.

Sergi San Julián representa a nova xeración de autores estatais que triunfan en Francia. O ilustrador presentará o seu último traballo, A conta atrás, sobre o desastre do Prestige, no que colabora co guionista Carlos Portela, codirector de Viñetas.

Santiago Valenzuela é coñecido polo seu personaxe Capitán Torrezno, protagonista de varios títulos. A súa última obra, O gabinete do doutor Salgari, publícase este verán.