Vieiros

Os eurodeputados recoñecen que un mal uso de Internet na nosa vida cotiá, especialmente polos menores, hai tempo que deixou de ser unha simple preocupación e está a comezar a alcanzar niveis de alarma social, debido ao incremento de pornografía infantil, a publicación de información para construír bombas e o acceso de menores a páxinas pornográficas ou os foros racistas e radicais.

O programa da Unión Europea, Safe Internet Plus, destinado a fomentar un uso máis seguro de Internet e que estará vixente ata o 2008, custa 45 millóns millóns de euros, dos que xa se levan gastados arredor de 20.

Presenta catro liñas de acción. En primeiro lugar, a loita contra "os contidos ilícitos" en Internet, co establecemento de liñas directas para que o cidadán se poida informar de contidos ilegais na rede (25-30% do orzamento).

En segundo lugar, a mellora de filtros para tratar contidos "indesexados" --virus, spam, etc.-- ou "nocivos" para menores (16-23%). A iso engádese o fomento dun contorno máis seguro en Internet por medio da autorregulación, códigos de conduta ou foros (5-9%). Por último e máis importante, o aumento da sensibilización cidadá sobre os riscos da mala utilización de Internet (43-50%).