Vieiros

O pesqueiro Nuevo Amadorín afundiu o luns á mañá fronte ao faro da Illa Pancha, en Ribadeo. Dous dos seus tripulantes morreron e un terceiro está desaparecido. O barco, con base no porto de Burela, encallou na zona a primeira hora da mañá, polo que acudiron ao rescate da tripulación o helicóptero Pesca 2, Salvamento Marítimo, Protección Civil e Garda Civil.

Os equipos de rescate só puideron recuperar dous cadáveres, o do armador, Máximo Blanco Galdo, de 44 anos, e mais o do mariñeiro de orixe colombiana Félix Armando Peña Reu, de 54 anos. Continúan na busca do terceiro tripulante, Óscar Blanco, de 19 anos e fillo do armador, o Helimer Galicia, o Serviola III, a Saturno e mais a Salvamar Sargadelos. Un cuarto mariñeiro salvouse porque non puido embarcar, ao se atopar hospitalizado.

A probábel causa do accidente foi o forte mar de fondo, con ondas de tres metros de altura, que puideron provocar que a embarcación encallase, e que os tripulantes fosen levados por un golpe de mar cando recollían os aparellos.