Vieiros

Os ataques da aviación do exército de Israel sobre Gaza continuaron na madrugada do sábado ao domingo. Tres mozos morreron polo impacto dun mísil, disparado contra o coche no que viaxaban polos militares israelís.

Fontes do exército, declararon que os falecidos pertencían a Hamás e que transportaban armas “dado o gran tamaño da explosión do automóbil”.

Outros mísiles israelís impactaron en talleres metalúrxicos que, segundo Israel, estanse a utilizar para fabricar bombas. Funcionarios médicos palestinos confirmaron a morte de catro persoas, tres delas civís.

Estado de excepción
A vaga de ataques do exército israelí está provocada, segundo afirman, en represalia polos ataques con foguetes Al Qasam por parte de militantes palestinos, na fronteira entre Gaza e Israel.

O ministro de Defensa israelí, Amir Peretz, declarou este domingo o "estado de excepción na Fronte de Guerra" -en referencia ás comunidades na fronteira con Gaza-, a través da creación dun mando especial con "autoridade adicional" durante 48 horas.

Pola súa banda, o primeiro ministro Ehud Olmert ameazou con intensificar a ofensiva se Hamás non cesaba nos seus ataques.

Cesamento do fogo
Mentres, as faccións rivais Al Fatáh e Hamás anunciaron un novo cesamento do fogo, este sábado. O portavoz de Hamás Fawzi Barhoum amosouse esperanzado sobre que a acción militar de Israel fortaleza o cesamento do fogo entre Hamás e Al Fatáh. "Aquí ninguén aceptaría loitar os uns contra os outros mentres os israelís están a bombardear Gaza", sinalou.

Durante a última semana de enfrontamento entre as dúas faccións palestinas morreron polo menos medio cento de persoas. Ao se facer efectivo o cesamento do fogo, os milicianos abandonaron as súas posicións nos teitos das casas e desbloquearon as vías de comunicación, e ambos bandos puxeron en liberdade os reféns apresados.

Ademais, os residentes aproveitaron a oportunidade para saíren ás rúas e faceren compras de alimentos e outros artigos de primeira necesidade.

Máis información no diario israelí Haaretz.