Vieiros

"Impuxéronnos un candidato presidencial", reprochou no seu discurso Turkan Saylan, presidenta da Fundación de Apoio a unha Vida Moderna, un dos colectivos que promoveu a masiva manifestación que tivo lugar esta fin de semana en Istambul. Foron arredor de 700 mil persoas, segundo a avaliación da propia policía, e máis dun millón, segundo defenden os organizadores. "Están tratando de transformar o pazo presidencial de Kemal Ataturk no pazo dunha secta relixiosa", laiouse Saylan.

Os manifestantes pedían a saída do poder do Partido da Xustiza e o Desenvolvemento, o AKP, e máis en concreto protestaban pola candidatura á presidencia da reública de Abdulá Gul, ministro de Exteriores e estreito colaborador do actual primeiro ministro, Tayip Erdogan. Durante a fin de semana, a patronal laica Tusiad posicionouse tamén publicamente contra os movementos no actual executivo e pediu a disolución do Parlamento e a convocatoria de eleccións xerais. "É necesario para protexermos o laicismo e a democracia", defende o colectivo empresarial.