Vieiros

Posada Carriles estaba a piques de saír da cadea, logo de pagar os 350 mil dólares de fianza estabelecidos pola xuíza que leva o caso. Antes de conseguir esa liberdade baixo fianza chegou o dictame do tribunal de apelacións, que rexeitou a decisión da xuíza de Texas.
 
Esta mesma semana, a embaixada de Cuba diante das Nacións Unidas enviáralle unha carta ao secretario xeral da ONU, Ban Ki Moon, pedindo que a Asemblea Xeral se pronunciase sobre o caso. "Cuba denuncia a complicidade e absoluta responsabilidade do goberno dos Estados Unidos coa liberación deste individuo responsábel de innumerábeis actos de terrorismo contra Cuba e outros países", argumentaban.
 
Alén da súa participación no ataque que lle custou a vida a 73 persoas que viaxaban nun avión cubano, documentos xa desclasificados polo goberno estadounidense probarían que Posada Carriles, que acaba de cumprir 79 anos, participou entre outros en diversas operacións para desestabilizar o goberno sandinista en Nicaragua e estivo implicado en torturas e desaparicións varias durante as ditaduras militares en Suramérica.