Vieiros

Son xa cincuenta anos de cooperación europea, dos que Galiza andivo preto da metade do camiño, algo máis de vinte anos. Este 25 de marzo cúmprense 50 anos da sinatura do Tratado de Roma, que puxo as bases do que hoxe é a Unión Europea.

Aproveitando a conmemoración, desde Bruxelas destacan algúns detalles: hoxe é moi doado viaxar por todo o continente sen necesidade de pasaporte; realizar transaccións financeiras alén das fronteiras dos estados cunha única moeda; milleiros de mozos aproveitaron programas como o Erasmus para estudar e vivir noutro país; a UE é o maior doador de axuda ao desenvolvemento en todo o mundo, as institucións europeas reforzaron a protección ao ambiente e a aposta polo crecemento sustentábel; a UE esforzouse en garantir a igualdade de xénero ou os dereitos dos consumidores; fixéronse ambiciosas políticas para favorecer rexións desfavorecidas...

Eses son algúns dos argumentos oficiais. O xornal The Independent propón, desde o punto de vista británico, medio cento de ideas polas que os cidadáns poden estar a prol da Unión Europea, entre eles: "linguas minorizadas como o irlandés, galés ou catalán son recoñecidas e protexidas (...) non hai pena de morte, xa que é incompatíbel coa integración na UE (...) o mercado único trouxo voos baratos e nova prosperidade para cidades esquecidas (...) os europeos son crecentemente multilingües, agás os británicos, que son menos".

Quedan por ver as razóns galegas. A favor? En contra? Se queren, poden deixar ideas a pé desta información.